Unha actividade organizada pola asociación cultural Veiguello de Vilaformán coa colaboración do Concello de Trabada

O II Encontro de Ilustración e Natureza xuntou no Teleclube da parroquia de Vilaformán aos veciños e veciñas de Trabada cos nenos e nenas do CEIP Celso Currás.

Foi unha actividade de convivenvia entre diferentes xeracións organizada pola asociación cultural Veiguello de Vilaformán coa colaboración do Concello de Trabada. Desenvolveuse durante a mañá de onte, luns 7 de outubro, coa participación da artista invitada Sarela Lorenzo.

Os veciños e veciñas de Trabada acudiron con prantas da zona e contáronlle aos nenos e nenas o uso que se lles daba, mentres que o alumnado, coa axuda de Sarela Lorenzo, compuxo unhas ilustracións.

“Quero agradecerlles a Ana moreiras e a Miguel de Lira a gran implicación que teñen con Trabada coa Asociación Cultural o Veiguello, a través da que realizan diversas actividades durante o ano na parroquia de Vilaformán para todos os veciños e veciñas do concello que desexen participar”, explica o alcalde, Rubén García.

“O Concello de Trababa continúa coa súa aposta de colaborar con tódalas asociacións, clubes e comisións de festas do noso concello, ofertando o maior número de actividades posible de carácter cultural, deportivo ou festivo”, engade o alcalde.

“É vital para o noso concello esa implicación e colaboración entre as asociacións e a administración local, con actividades para a veciñanza ás que incluso se achegan persoas de concellos veciños”, remata Rubén García.